Tatarystan Respublikasynyň Müňýyllyk meýdançasynda «Ýüpek ýoly — 2023» halkara rallisiniň açylyş dabarasy guraldy. 93 ekipažy bir ýere jemlän iri awtomobil ýaryşynyň açylyşy gyzykly konsert maksatnamasy bilen başlandy.
Konsertden soň ýaryşa gatnaşýan ýurtlaryň baýdaklary getirildi. Ýaryşa gatnaşýan 21 ýurduň baýdaklarynyň arasynda Türkmenistanyň ýaşyl Tugunyň bardygyny aýratyn bellemek gerek.
Ralliniň açylyş dabarasynda Russiýa Federasiýasynyň daşary işler ministri Sergeý Lawrow, Tatarystan Respublikasynyň Baştutany Rustam Minnihanow we beýleki ýolbaşçylar çykyş etdiler.
Şu gün — 7-nji iýulda ýaryşa gatnaşjak ekipažlar ralliniň ýörite niýetlenen bölegini geçerler. Olaryň şu günki geçmeli menzili 141 kilometre barabar bolar.
Bu rallä türkmen ekipažlarynyň üçüsi gatnaşyp, olar T2 görnüşinden bäsleşýärler. Ýaryşa gatnaşmak üçin Russiýa Federasiýasynda bolýan türkmen toparyna ekipažlary düzýän sürüjilerden we şturmanlardan başga-da, mehanikleriň birnäçesi wekilçilik edýär.
Umuman, bu ralli Tatarystanyň paýtagty Kazan şäheri bilen Russiýa Federasiýasynyň Moskowa şäherlerini birleşdirip, Russiýanyň 13 sebitiniň üstünden geçer. 21 ýurtdan gelen türgenler 5 müň kilometrden gowrak menzil geçerler.