Birleşen Milletler Guramasynyň Baş Assambleýasynyň 1995-nji ýylyň 12-nji dekabryndaky Kararnamasy bilen ykrar edilen we BMG-niň Baş Assambleýasynyň 2015-nji ýylyň 3-nji iýunyndaky Kararnamasy bilen tassyklanan hemişelik Bitaraplyk derejesi Türkmenistanyň daşary syýasatynyň, ýurduň köptaraplaýyn özara hereketleri giňeltmek boýunça çemeleşmeleriniň esasy bolup çykyş edýär. Şu ýyl Türkmenistan özüniň hemişelik Bitarap döwlet hökmünde halkara derejede ykrar edilmeginiň 27 ýyllygyny belleýär.
Türkmenistanyň başlangyjy bilen dawalaryň öňüni almak hem-de sebäplerini we netijelerini aradan aýyrmak babatda Bitaraplygyň ýörelgelerini iş ýüzünde ulanmak boýunça köptaraplaýyn gepleşikleri dowam etdirmek maksady bilen, häzirki wagtda guramanyň agza döwletleriniň goldawy bilen BMG-niň meýdançasynda Parahatçylygyň, howpsuzlygyň we ösüşiň bähbidine Bitaraplygyň dostlary topary döredildi.
Bu toparyň nobatdaky duşuşygy Türkmenistanyň baky Bitaraplygynyň 27 ýyllyk toýunyň öňüsyrasynda Daşary işler ministrliginde geçirildi. Oňa ýurdumyzdaky daşary ýurtlardaky diplomatik wekilhanalaryň ýolbaşçylary, Türkmenistanyň daşary ýurtlardaky ilçileri we beýleki myhmanlar gatnaşdy.
“Atavatan Türkmenistan” halkara žurnalynyň hem çagyrylan duşuşygyna Merkezi Aziýanyň daşary işler ministrleriniň orunbasarlary, şol wagtda BMG-niň Baş Sekretarynyň ýörite wekili, BMG-niň Merkezi Aziýa üçin öňüni alyş diplomatiýasy boýunça Sebitleýin merkeziniň baştutany Natalýa German hem-de BMG-niň Ösüş maksatnamasynyň Türkmenistanda hemişelik wekili hanym Narine Saakýan hem gatnaşdy.
Duşuşykda edilen çykyşlarda dünýäde dowam edýän çylşyrymly döwürde türkmen Bitaraplygynyň, umuman bitaraplyk syýasatynyň ähmiýetiniň möhüm orun eýeleýändigini bellediler. Hususan-da, türkmen Bitaraplygynyň dünýäde we sebitde durnuklylygyň we howpsuzlygyň kepili bolup durýandygy aýdylyp geçildi.
Duşuşykda Türkmenistanyň daşary işler ministriniň orunbasary Wepa Hajiýew, BMG-niň Baş Sekretarynyň ýörite wekili, BMG-niň Merkezi Aziýa üçin öňüni alyş diplomatiýasy boýunça Sebitleýin merkeziniň baştutany Natalýa German, Özbegistanyň daşary işler ministriniň orunbasary Gairat Fazilow, Azerbaýjanyň daşary işler ministriniň orunbasary Halaf Halafow, Eýranyň daşary işler ministriniň orunbasary Reza Najafin, Täjigistanyň daşary işler ministriniň orunbasary Muzaffar Husseinzoda, Türkmenistanyň BMG-niň ýanyndaky hemişelik wekili Aksoltan Ataýewa, BMG-niň Türkmenistandaky hemişelik wekili Dmitriý Şlapaçenko, BMG-niň Ösüş maksatnamasynyň Türkmenistanda hemişelik wekili hanym Narine Saakýan we daşary ýurtly ilçiler çykyş etdiler.