Meksikaly paleontologlar ýyrtyjylary gorkuzmak we garşy jynsy özüne çekmek maksady bilen güýçli sesleri çykaran dinozawryň galyndylarynyň üsti açyldy. Bu dinozawryň 73 million mundan ozal ýaşandygy aýdyldy. “Tlatolophus galorum” diýlip at berlen dinozawryň galyndylary Meksikanyň Döwlet antropologiýa we taryh institutynyň gazuw-agtaryş topary tarapyndan ýurduň demirgazyk-gündogaryndaky General Kapeda diýlen sebitden tapyldy. Geçirilen barlaglara görä, bu dinozawryň guýruk süňki 2013-nji ýylda tapyldy. Soňky wagtlarda geçirilen gazuw-agtaryş işlerinde bolsa, dinozawryň 80%-iniň, 1,3 metr uzynlykdaky baş we uýluk süňküniň üsti açyldy.
Meksika Döwlet uniwersitetinden Angel Ramirez-Welasko bu barada şeýle diýýär: “Gazuw-agtaryş işlerinde dinozawryň baş süňküni tapmak umydymyzy ýitirsek-de, dinozawryň guýruk süňküniň üstüni açanymyzdan soň ýene gazuw-agtaryş işlerine dowam etdik. Ahyrsoňy uýluk we kürek süňkleriniň hem üstüni açdyk”.
Tapylan baş süňküniň we burnunyň üstünde geçirilen analiz dinozawryň bu görnüşiniň bu sebitde ozal ýaşap geçen beýleki dinozawrlardan tapawutlydygyny görkezdi. Gazuw-agtaryş işlerine gatnaşan paleontologlar bu barada: “Bu dinozawryň pessaý eşdilýän sesleri hem ýokary derejede eşitmäge ukyply gulaklarynyň we “gürlemäge” hem ukyplarynyň bardygyny biz ozaldan bilýäris. Şol sebäpli bu dinozawrlar beýlekilerden tapawutlanýarlar” diýýärler.
Maksat TAGANOW,
Magtymguly adyndaky
Türkmen döwlet uniwersitetiniň žurnalistika hünäriniň talyby.