Ispaniýanyň “Sewilýa” topary Ýewropa ligasynyň kubogyny gazanmak ugrundaky ýaryşyň finalynda Italiýanyň “Inter” toparyny 3:2 hasabynda utup, bu kubogy 6-njy gezek eýeledi. 6 gezek Ýewropa ligasynyň ýeňijisi bolan “Sewilýa” topary bu ugurda rekord goýdy.
Bu duşuşyk örän çekeleşikli boldy. Birinji ýarymyň 5-nji minutynda belgiýaly hüjümçi Romelu Lukaku 11 metrlik jerime urgusyndan “Inter” toparyny öňe geçirdi. 12-nji minutda “Sewilýa” Lýuk de Ýonguň goly bilen hasaby deňledi we 33-nji minutda ýene şol futbolçynyň geçiren goly bilen “Sewilýa” öňe geçdi.
35-nji minutda “Inter” Godiniň goly bilen hasaby deňledi. Hasap 2:2 boldy. Duşuşykda “Sewilýa” toparyna hem ýeňşi hem-de kubogy getiren goly 74-nji minutda Diego Karlos öz adyna ýazdyrdy.
Şeýlelikde, “Sewilýa” topary Ýewropa ligasynyň kubogyny 6-njy gezek gazandy. Mundan ozal, bu topar 2006-njy, 2007-nji, 2014-nji, 2015-nji hem-de 2016-njy ýyllarda bu kubogy eýeledi. Ispan topary soňky 15 ýylda bu kubogy gazanmak ugurndaky ýaryşda 6 gezek finala çykdy hem-de 6-synda-da ýeňiş gazandy.
Mälim bolşy ýaly, 2008/09-njy ýylyň möwsümine çenli bu ýaryş UEFA Kubogy diýlip atlandyrylan bolsa, şondan soňra Ýewropa ligasy diýlip atlandyryldy.