16 ýurtdan 666 toparyň gatnaşyjylary adama meňzeş robotlaryň II Bütündünýä bäsleşiginiň dabaraly açylyş çäresine gatnaşdylar. Ýaryşlar Pekiniň “Buzly lenta” gyşky oýunlaryň stadionynda geçirilýär.
2 müňden gowrak tehnikanyň gatnaşmagynda geçirilýän ýaryşlar 26-njy awgusta çenli dowam eder. Onuň maksatnamasyna sportuň 30 ugry (toply oýunlar, ylgamak) we önümçilik (senagatda ulanylyşy), durmuş hyzmatlary (myhmanhana we restoran hyzmatlary) pudagy boýunça bäsleşikleriň 21 görnüşi girizildi.
“Akyly bäsleşik — geljege” şygary astynda 1,3 müň töweregi bäsleşik geçiriler.
Açylyş dabarasyndan öň tomaşaçylar kiçiräk futbol meýdançasynda robotlaryň oýnuna tomaşa etdiler. Dabara tamamlanandan soňra, 100 we 400 metr aralyga ylgamak boýunça bäsleşiklerde robotlar ylgaw meýdançasynda öz başarnyklaryny görkezdiler.
2026-njy ýylda bäsleşige uzak aralyga ylgamak, agyr atletika we stol tenisi ýaly sport görnüşleri goşuldy.
Bäsleşigiň guramaçylary hökmünde Pekin şäher häkimligi, Hytaýyň Mediakorporasiýasy, Robototehnika pudagynda hyzmatdaşlyk boýunça Bütündünýä guramasy we Aziýa-Ýuwaş umman sebitinde Robototehnika boýunça dünýä kubogynyň Halkara geňeşi çykyş etdi. Dürli modellerdäki we brendlerdäki robotlaryň aýratynlyklaryny göz öňünde tutýan tehnologik binýada eýe bolan bu ýaryşlary geçirmegiň maksady — robotlaşdyrylan tehnologiýalary adamlaryň önümçilik we gündelik durmuşyna giňden ornaşdyrmakdan ybaratdyr.
Adama meňzeş robotlaryň I Bütündünýä bäsleşigi 2025-nji ýylyň 15-17-nji awgusty aralygynda takmynan 500 robotyň gatnaşmagynda geçirilipdi. Şonda Awstraliýa, Braziliýa, Germaniýa, Italiýa, Indoneziýa, ABŞ we Ýaponiýa ýaly 16 ýurtdan 280 topar öz ukyp-başarnyklaryny görkezipdi.