Şu gün Hazaryň kenaryndaky “Awaza” milli syýahatçylyk zolagynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň, Özbegistan Respublikasynyň Prezidenti Şawkat Mirziýoýewiň hem-de Azerbaýjan Respublikasynyň Prezidenti Ilham Aliýewiň gatnaşmagynda “Türkmenistan-Azerbaýjan-Özbegistan” ýokary derejdäki üçtaraplaýyn duşuşyk geçiriler.
Bu sammite gatnaşmak üçin Özbegistan Respublikasynyň Prezidenti Şawkat Mirziýoýew hem-de Azerbaýjan Respublikasynyň Prezidenti Ilham Aliýew “Awaza” milli syýahatçylyk zolagyna geler.
Hazaryň kenaryndaky ýokary derejedäki duşuşykda köptaraplaýyn hyzmatdaşlygy ösdürmek hem-de pugtalandyrmak, söwda-ykdysady, ulag-kommunikasiýa, energetika we ynsanperwer ugurlardaky hyzmatdaşlyk gatnaşyklary ara alnyp maslahatlaşylar.
Şeýle hem duşuşygyň çäklerinde birnäçe bilelikdäki resminamalaryň gol çekilmegine garaşylýar.
Mundan başga-da, duşuşygyň çäklerinde ikiçäk duşuşyklar geçiriler.
Mälim bolşy ýaly, şu ýylyň 5-nji awgustynda “Awaza” milli syýahatçylyk zolagynda geçirilen BMG-niň Deňze çykalgasy bolmadyk ösüp barýan döwletler boýunça üçünji maslahatynyň çäklerinde ürkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň, Özbegistan Respublikasynyň Prezidenti Şawkat Mirziýoýewiň hem-de Azerbaýjan Respublikasynyň Premýer-ministri Ali Asadowyň gatnaşmagynda hem üçtaraplaýyn duşuşyk geçirilipdi.