Çiliniň täze Prezidenti Gabriel Boriç boldy. Ol özüniň esasy bäsdeşi Hose Antonio Kasta saýlawlara gatnaşandygy üçin minnetdarlyk bildirip, onuň ýurdy ösdürmek baradaky tekliplerini seretmäge taýýardygyny belledi.
– Bu saýlawlara gatnaşan ähli dalaşgärlere minnetdarlyk bildirmek isleýärin. Çiliniň geljegi üçin biziň hemmämiz halkyň ýanynda bolmalydyrys – diýip, täze Prezident Gabriel Boriç saýlawlardan gazanan ýeňşinden soňra eden çykyşynda belläp geçdi.
19-njy dekabrda Çilide prezident saýlawlarynyň 2-nji tapgyry geçirildi. Ýurduň saýlaw toparynyň beren maglumatyna görä, Boriç sesleriň 55,87 göterimine, Kasta bolsa sesleriň 44,12 göterimine eýe boldy.
Täze Prezident 2022-nji ýylyň 11-nji martynda resmi taýdan wezipesine girişer. Ol ýurduň taryhyndaky iň ýaş döwlet baştutany bolar. Kasam kabul ediş dabarasy döwründe ol 36 ýaşar.