Şu ýylyň 3 — 5-nji noýabry aralygynda Aşgabat şäherinde Koreýanyň Medeniýet hepdeligi geçiriler. Onuň dowamynda konsert hem-de koreý filmleriniň görkezilişi guralar.
Koreýanyň Türkmenistandaky ilçihanasynyň habar bermegine görä, 3-nji noýabrda Türkmenistanyň Magtymguly adyndaky milli sazly drama teatrynda Koreýanyň «ONDO» sazandalar toparynyň konserti guralar. Konsert 19:00-da başlanar.
4-5-nji noýabrda bolsa «Aşgabat» kinoteatrynda koreý filmleriniň görkezilişi bolar. Aşgabat şäheriniň ýaşaýjylary we myhmanlary üçin görkeziljek «Beýsbol oýunçysy», «Diwa» şeýle-de «Gizlin haýwanat bagy» atly koreý filmleri subtitr arkaly rus diline terjime ediler.