Dünýäniň iki uly ykdysadyýetine eýe bolan ýurtlaryň – ABŞ-nyň we Hytaýyň arasynda taryhy söwda ylalaşygyna gol çekildi. Köpden bäri geçirilýän gepleşikleriň esasynda gol çekilen ylalaşyk amerikan-hytaý söwda gatnaşyklarynyň gowulanmagyna ýardam eder.
Bu ylalaşyk ABŞ-nyň Prezidenti Donald Tramp bilen Hytaýyň Döwlet Geňeşiniň wise-premýeri Lýu He tarapyndan gol çekildi.
Söwda-ykdysady ylalaşygynyň birinji tapgyryny düzýän bu ylalaşygyň şertlerine laýyklykda, Hytaý öňümizdäki 2 ýylyň dowamynda 200 milliard dollar möçberinde Amerikanyň önümlerini we hyzmatlaryny satyn alar. Şeýle hem Amerikanyň senagat, oba hojalyk harytlarynyň we energiýa serişdeleriniň Hytaýa eksporty göz öňünde tutuldy. Hususan-da, 75 milliard dollar möçberinde senagat, 40 milliard dollardan gowrak oba hojalyk önümleriniň hem-de 50 milliard dollara golaý energiýa serişdeleriniň alynmagy meýilleşdirildi.
– Bu örän möhüm we ähmiýetli wakadyr. Şu gün biz möhüm ädim ätdik – diýip, ABŞ-nyň Prezidenti Donald Tramp belledi.
Hytaýyň wise-premýeri öz gezeginde bu ylalaşygyň diňe bir Hytaýyň we ABŞ-nyň däl, eýsem tutuş dünýäniň söwda gatnaşyklaryna oňyn täsirini ýetirjekdigini belläp geçdi.