Azerbaýjanyň Milli kitaphanasynyň binýadynda türki döwletleriň kitaphana ulgamlarynyň ýolbaşçylarynyň usulyýet maslahaty geçirildi. Çäre Birinji Türkologiýa gurultaýynyň 100 ýyllygyna bagyşlandy.
Türkmenistana bu maslahatda Aşgabat şäheriniň Medeniýet müdirliginiň Merkezleşdirilen kitaphanalar ulgamynyň direktory Enejan Geldiýewa hem-de Döwlet medeniýet merkeziniň Döwlet kitaphanasynyň müdiriniň orunbasary Laçin Nurmuhammedowa wekilçilik etdi.
Maslahatyň esasy mowzugy ugurdaş edaralaryň arasynda sanly hyzmatdaşlygy ösdürmekden ybarat boldy. Gatnaşyjylar medeni taslamalar baradaky habarlary resmi kitaphana web-saýtlarynyň üsti bilen ýaýratmagy hem öz içine alýan maglumat alyş-çalşyny giňeltmegiň mümkinçiliklerini ara alyp maslahatlaşdylar. Şeýle hem duşuşygyň çäklerinde gurultaýyň 100 ýyllygy mynasybetli taýýarlanan bibliografik neşiriň tanyşdyrylyşy geçirildi.
Işewürlik maksatnamasyndan başga-da, gatnaşyjylar üçin medeni-tanyşdyryş çäresi guraldy. Kitaphana ulgamlarynyň wekilleri Bakunyň taryhy ýadygärliklerine, şol sanda Haly muzeýine baryp gördüler. Bu bolsa myhmanlara Azerbaýjanyň baý binagärlik we medeni mirasy bilen has içgin tanyşmaga mümkinçilik berdi.