Russiýanyň “Rosatom” döwlet korporasiýasy Gyrgyz Respublikasynyň Batken we Yssyk-Kul oblastlarynda 2 sany ýel energetika taslamasyny durmuşa geçirer. Bu barada “Rosatom Gyrgyzystan” edarasynyň baş müdiri Dmitriý Konstantinow habar berdi.
– Gyrgyzystanda ýel energetika taslamasy boýunça iki meýdançanyň üstünde iş alyp barýarys. Yssyk-Kul oblastynda 100 MWt (bahasy 100 mln dollar) we Batken oblastynda 80 MWt güýjünde ýel elektrik beketlerine maýa goýumlar özleşdiriler – diýip, Dmitriý Konstantinow belläp geçdi.
Onuň bellemegine görä, Gyrgyzystanyň Energetika ministrligi bilen bilelikde 500 MWt-a çenli güýjünde ýel energetika taslamalaryny durmuşa geçirmek meýilnamalar bar.
Ýel energetika taslamalaryndan başga-da, rus-gyrgyz ösüş gaznasynyň goldaw bermegine birnäçe gidroelektrik stansiýalary gurmak meýilleşdirilýär.