Türkmenistanyň Daşary işler ministrliginiň Halkara gatnaşyklary institutynda ulag diplomatiýasy boýunça duşuşyk geçirildi. Bu duşuşyga institutyň professor-mugallymlary, Strategik barlaglar boýunça ylmy merkeziniň işgärleri şeýle-de talyp ýaşlar gatnaşdylar.
Onuň dowamynda BMG-niň ýanyndaky Ulag diplomatiýasynyň Halkara merkeziniň ýerine ýetiriji sekretary Igor Runow “Merkezi Aziýa we Günorta Kawkaz ulag geçelgesiniň mümkinçilikleri” atly temasy boýunça çykyş etdi. Çykyşda halkara we sebit derejesinde ulag-logistika ulgamyny ösdürmekde gazanylan netijelere aýratyn üns çekildi.
Hususan-da, Türkmenistanyň Prezidentiniň teklipleri esasynda ulag ulgamynda öňe sürülýän başlangyçlaryň dünýä jemgyýetçiligi tarapyndan giň goldawa eýe bolýandygy hakynda aýratyn bellenilip geçildi.
Duşuşygyň çäklerinde BMG-niň ýanyndaky Ulag diplomatiýasy boýunça Halkara merkeziň ýerine ýetiriji sekretary Igor Runow institutdaky Türkmen diplomatiýasynyň taryhy muzeýi bilen tanyş boldy we talyplar bilen sorag-jogap alyşdy.