Ýakynda paýtagtymyzda ýerleşýän “Watan” kinokonsert zalynda Täze ýyl mynasybetli Türkmenistanyň at gazanan artisti Gasan Mamedowyň aýdym-sazly çykyşy boldy.
Tomaşaçylaryň uly gyzyklanma bildiren bu konsertinde Türkmenistanyň at gazanan artisti Berdimyrat Berdiýew hem öz çykyşlary bilen sahnany bezedi. Konsertiň dowamynda Gasan Mamedow öz ajaýyp sazlary bilen tomaşaçylaryň göwnüni galkyndyrdy. Ol diňe saz bilen çäklenmän, eýsem, şirin owazly aýdymlary hem ýerine ýetirdi.
Konsertiň dowamynda Berdimyrat Berdiýew ýakyn dosty Gasan Mamedow bilen geçiren ýyllary, sungat älemindäki üstünlikleri we geçen ýollary şeýle hem, gezen ýerleri baradaky täsirli gürrüňleri hem tomaşaçylarda uly gyzyklanma döretdi.
Konsertiň soňunda bolsa, Gasan Mamedow türkmen halkyny ýetip gelýän Täze ýyl baýramy bilen gutlady.