Şu günler dünýäniň dürli künjeklerinde koronawirus ýokanjy sebäpli girizilen çäklendirmeler gowşadylýar ýa-da ýatyrylýar. Şeýle ýurtlaryň biri hem Niderlandlar Patyşalygy boldy.
Ýurduň saglygy goraýyş ministri Ernst Kuipers çäklendirmeleri kem-kemden gowşadyp, 25-nji fewralda doly aradan aýyrmagyň göz öňünde tutulýandygyny belledi. Ol bu barada beren beýanatynda erbet günleriň yzda galandygyny belläp, bar bolan maglumatlara laýyklykda, wirusyň täze görnüşleriniň gaty bir gorkuzyjy derejede däldigini mälim etdi.
Şeýle hem ol ilatyň agramly böleginiň sanjym edilip, immun derejesiniň ýokarlanandygy üçin çäklendirmeleri ýatyrmagyň mümkindigini belledi.
Tapgyrma-tapgyr çäklendirmeleriň ýatyryljakdygyny bellän ministr öýler üçin myhman sanyny çäklendirmegiň aradan aýrylandygyny, öý eýeleriniň islän möçberde myhman çagyryp biljekdigini belledi.
Karantin möhletiniň 5 gün bilen çäklendirilendigini bellän ýurduň saglygy goraýyş edarasynyň ýolbaşçysy öýden işlemegiň zerurlygynyň ýokdugyny, restoranlar, teatrlar we kino merkezleriniň 500 we şondan köp möçberde müşderi kabul edip biljekdigini aýtdy.
Ýurtda agyz-burun örtügini dakynmak hem-de howpsuz araçägi saklamak diňe jemgyýetçilik ulaglarynda we howa menzillerinde hökmany bolar.