Türkmenistanyň Daşary işler ministri Raşid Meredow “Al-Arabiýa” teleýaýlymynyň esasy alyp baryjysy Riz Hanyň ýolbaşçylygyndaky wekiliýet bilen duşuşdy.
Duşuşygyň dowamynda türkmen tarapynyň geljekde dünýä KHBS-ri bilen, hususan-da “Al-Arabiýa” meşhur teleýaýlymy bilen hyzmatdaşlygy ösdürmäge bolan gyzyklanmasy barada bellenip geçildi.
Şunuň bilen baglylykda, taraplar hyzmatdaşlygyň mümkin bolan görnüşlerini, şol sanda Türkmenistanyň ýokary okuw mekdepleriniň žurnalistika fakultetleriniň talyplary üçin “Al-Arabiýa” tarapyndan okuw sapaklarynyň geçirilmegi hem-de ýerli KHBS-niň işgärleri üçin hünärini kämilleşdirmek boýunça maksatnamalary ara alyp maslahatlaşdylar.
Öňdebaryjy köpçülikleýin habar beriş serişdeleriniň, hususan-da “Al-Arabiýa” teleýaýlymynyň halkara hyzmatdaşlygy ösdürmekdäki orny barada aýratyn nygtaldy.
“Al-Arabiýa” wekiliýeti işjeň hyzmatdaşlyga taýýardygyny tassyklap, Türkmenistanyň bitaraplygynyň 30-ýyllygy mynasybetli ýurdumyzda geçirilmegi meýilleşdirilýän çärelere gatnaşmaga çagyrylandygy üçin minnetdarlygyny bildirdi.