Şu gün Türkmenistanyň Prezidenti Ministrler Kabinetiniň giňişleýin mejlisi geçirildi. Ýurdumyzyň halk hojalygynda 2022-nji ýylda gazanylan netijelere bagyşlanan mejlisiň barşynda birnäçe guramaçylyk meselelerine garaldy.
“Watan” habarlar gepleşiginde bellenilip geçilişi ýaly, «Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyny» üstünlikli durmuşa geçirmek maksady bilen 2023-nji ýylda ýurdumyzy durmuş-ykdysady taýdan ösdürmegiň Maksatnamasynyň taslamasy işlenip düzüldi.
Bu maksatnama laýyklykda, 2023-nji ýylda jemi içerki önümiň ösüş depginini 6.5 göterime ýetirmek, milli ykdysadyýetimiziň pudaklaryny, şeýle hem ýurdumyzyň sebitlerini durnukly ösdürmek, önümçilik kärhanalaryny doly güýjünde işledilmegini gazanmak, täze karhanalary gurmagyň hasabyna 3 müňe golaý täze iş orunlaryny döretmek, daşary söwda dolanyşygynyň möçberini 19.4 milliard amerikan dollaryna ýetirmek, kiçi we orta telekeçiligi ösdürmek, jemi içerki önümiň düzüminde ýangyç-ernergetika toplumyny goşmazdan, hususy pudagyň paýyny 71,3 göterime ýetirmek ýaly işler göz öňünde tutulýar.
Türkmenistanyň Prezidenti mejlisde bu maksatnamany tassyklamak hakyndaky degişli resminama gol çekdi.