Hytaý hökümeti Ewerest dagynyň Tibet awtonom ülkesine degişli ýerlerine çykmagy wagtlaýynça çäklendirdi. Munuň sebäbi bolsa syýahatçylardan galan ýakymsyz miras ― ýüzlerçe tonna zir-zibildir.
«South China Morning Post» gazetiniň ýazmagyna görä, geçen aýyň ahyrynda gelnen we biraz soňra köpçülige ýetirilen karar bilen 5 müň 200 metr belentlikdäki daga çykmak çäklendirildi ýa-da düýbünden gadagan edildi. Çünki şunça belentlikden ýygnalan zir-zibiliň mukdary 8 tonnadan hem geçýär. Aşagrakdaky böleklere ýygnanan zibilleri hasaba alanyňda bolsa, ol 355 tonna çenli ýetýär.
Täze karara görä, indi bu beýiklige diňe ýörite rugsatnamasy bolan adamlar çykyp biler. Olardan hem zibillerini daga zyňman, yzyna getirmek talap ediler. Şeýlelikde, şu ýyl Ewerestiň Hytaýdaky belentliklerine dyrmaşjak adamlaryň sany 300-den geçmez. Soňky sekiz ýylda bu daga 40 döwletden 20 müňden gowrak syýahatçy çykypdy.