Halkara we türkmen kompaniýalary 2026-njy ýylyň 3–5-nji noýabry aralygynda Aşgabat şäherindäki Türkmenistanyň Söwda-senagat edarasynda geçiriljek «Türkmenistanyň gurluşyk, senagat, himiýa we energetika pudaklarynyň ösüşi» atly halkara maslahatyň we serginiň — CIET 2026-nyň kümüş hemaýatkärleri hökmünde çykyş ederler. Forum «Innowasiýa • Maýa goýum • Ösüş» şygary astynda geçiriler.
Forumyň kümüş hemaýatkärleriniň hatarynda “TOYO Engineering”, “Ýiti Galam”, “Rysgally Inžener”, “Daewoo E&C”, “Türkmen Bina Gurluşyk”, ITOCHU, “Rysgally Zähmet”, “Sahra Gurluşyk”, “Altyn Nesil”, “Saýaly Menzil” we “Aga-Gurluşyk” kompaniýalary bar. Olaryň hataryna halkara inženerçilik we söwda korporasiýalary bilen birlikde, ýerli gurluşyk kompaniýalary hem girýär.
“TOYO Engineering” kompaniýasynyň Türkmenistanda gazhimiýa taslamalaryny durmuşa geçirmekde tejribesi bar. Ýapon kompaniýasy Gyýanlydaky polimer zawodynyň gurluşygyna gatnaşyp, gazy bölüp aýyrmak, etilen we polipropilen öndürmek boýunça desgalarda işleri ýerine ýetirdi. Taslama 2018-nji ýylda tamamlandy. 2025-nji ýylda TOYO kompaniýasy Rönesans Endüstri Tesisleri bilen bilelikde zawody düýpli abatlamagyň birinji tapgyry boýunça şertnama baglaşdy. 2026-njy ýylyň fewralynda kompaniýa «Türkmenhimiýa» döwlet konserni bilen abatlaýyş işleriniň ikinji tapgyry boýunça hyzmatdaşlygy göz öňünde tutýan özara düşünişmek hakynda Ähtnamanyň baglaşylandygyny habar berdi. Resminama 2025-nji ýylyň dekabrynda gol çekilipdi.
“Ýiti Galam” kompaniýasynyň Türkmenistanda geçirilýän pudaklaýyn sergilere gatnaşmakda tejribesi bar. 2023-nji ýylda kompaniýa «Ak şäherim Aşgabat» atly XXII halkara köpugurly sergide durmuşa geçiren we geljekde amala aşyrmagy meýilleşdirýän taslamalaryny tanyşdyrdy. Şu ýyl kompaniýa CIET 2026 forumyna kümüş hemaýatkär hökmünde goldaw berer.
“Rysgally Inžener” kompaniýasy hem forumyň kümüş hemaýatkärleriniň hataryna goşuldy. Kompaniýa Türkmenistanyň gurluşyk, senagat, himiýa we energetika pudaklarynyň ösüşine bagyşlanan halkara maslahata we sergä goldaw berer.
“Daewoo E&C” kompaniýasy Türkmenistan bilen himiýa senagaty we infrastruktura ulgamlarynda hyzmatdaşlygy ösdürýär. Günorta Koreýanyň kompaniýasy S. A. Nyýazow adyndaky Türkmenabat himiýa zawodynda mineral dökünleri öndürýän toplumyň gurluşyk taslamasyny durmuşa geçirýär. Taslamanyň düýbüni tutmak dabarasy 2025-nji ýylyň oktýabrynda geçirildi. Taslama superfosfat we ammoniý sulfat dökünleriniň önümçiligini göz öňünde tutýar. 2026-njy ýylyň sentýabrynda Daewoo E&C kompaniýasy bilen Türkmenistanyň Suw hojalygy baradaky döwlet komiteti Garagum derýasynyň bir bölegini döwrebaplaşdyrmak boýunça hyzmatdaşlyk etmek hakynda özara düşünişmek Ähtnamasyna gol çekdiler.
“Türkmen Bina Gurluşyk” kompaniýasy raýat we senagat gurluşygy pudaklarynda iş alyp barýar. 2012-nji ýylda esaslandyrylan kompaniýa gurluşyk-gurnama işlerine, senagat desgalarynda gurnama işlerine we ulag hyzmatlaryna ýöriteleşendir. Kompaniýanyň durmuşa geçiren taslamalarynyň hatarynda bilim edaralary, köp gatly ýaşaýyş jaýlary we kottej toplumlary bar.
ITOCHU Corporation halkara söwda we maýa goýum işleri bilen meşgullanýan ýapon korporasiýasydyr. Onuň iş ugurlary maşyn gurluşygyny, metallary we mineral serişdeleri, energetikany, himiýa senagatyny, maglumat tehnologiýalaryny hem-de beýleki pudaklary öz içine alýar. ITOCHU korporasiýasynyň halkara wekilçilik ulgamyna Aşgabatdaky şahamçasy hem girýär.
“Rysgally Zähmet” kompaniýasynyň çap eden maglumatlaryna görä, ol 2009-njy ýylda esaslandyrylyp, raýat, senagat we infrastruktura gurluşygy ugurlarynda iş alyp barýar. Kompaniýa taslamanyň başlangyç konsepsiýasyny işläp taýýarlamakdan we inženerçilik işlerinden başlap, desgalary ulanmaga bermek hem-de soňraky tehniki hyzmatlary ýerine ýetirmek ýaly giň gerimli hyzmatlary hödürleýär. Kompaniýanyň köpçülige hödürlän taslamalarynyň hatarynda ýaşaýyş we dolandyryş binalary, şeýle hem Gyýanlydaky polimer zawodynda we oňa eltýän ýolda ýerine ýetirilen işler bar.
“Sahra Gurluşyk” kompaniýasy Türkmenistanyň gurluşyk pudagynda iş alyp barýar. Kompaniýanyň resmi maglumatlaryna görä, onuň iş ugurlary köprüleriň, sütünli binýatlaryň we senagat binalarynyň gurluşygyny, ýer işlerini, şeýle hem ýygnama demir-beton önümleriniň önümçiligini öz içine alýar.
“Altyn Nesil” kompaniýasynyň ýol gurluşygy taslamalaryny durmuşa geçirmekde tejribesi bar. Kompaniýa baş potratçy «Türkmen Awtoban» tarapyndan berlen buýurma esasynda Aşgabat–Türkmenabat ýokary tizlikli awtomobil ýolunyň Tejen–Mary böleginde gurluşyk we abadanlaşdyryş işlerini ýerine ýetirdi. Ýoluň bu bölegi 2024-nji ýylyň 17-nji aprelinde ulanmaga berildi.
“Saýaly Menzil” kompaniýasy Türkmenistanda, şol sanda Arkadag şäherinde amala aşyrylýan gurluşyk taslamalaryna gatnaşýar. Kompaniýa şäheriň gurluşygynyň ikinji tapgyryna gatnaşýan potratçylaryň hataryna girýär we ýaşaýyş jaýlarynyň gurluşygynda tejribä eýedir.
“Aga-Gurluşyk” kompaniýasynyň ýaşaýyş we dolandyryş binalaryny gurmakda tejribesi bar. Kompaniýa Aşgabat şäherini ösdürmegiň 13-nji tapgyrynyň gurluşygyna gatnaşan potratçylaryň hatarynda boldy. 2025-nji ýylyň oktýabrynda kompaniýa Azerbaýjanyň Fuzuli şäherinde metjidi taslamak we gurmak boýunça şertnama baglaşdy.
CIET 2026 forumynyň maksatnamasy pudaklaýyn maslahatlary, halkara sergini, şeýle hem öňünden meýilleşdirilen B2B we B2G görnüşindäki işewürlik duşuşyklaryny öz içine alýar. Gatnaşyjylar maýa goýumlary, senagaty döwrebaplaşdyrmak, infrastrukturany ösdürmek we täze tehnologiýalary ornaşdyrmak meselelerini ara alyp maslahatlaşarlar.