Russiýa Federasiýasynda geçirilýän futbol boýunça dünýä çempionatynda jemleýji duşuşyklar galdy. Dünýäniň baş kubogynyň almak ugurndaky final duşuşygynda Fransiýa bilen Horwatiýanyň ýygyndylary duşuşar. Fransiýa Belgiýanyň ýygyndysyny 1:0 hasabynda utup, 20 ýyldan soňra täzeden finala çykdy.
Horwatiýa bolsa şu çempionatda erjel oýnap, finala galmagy başardy. Olar futbolyň ata watany bolan Angliýanyň milli ýygyndysyny 2:1 hasabynda utdy. Oýun diýseň ýatda galyjy pursatlary özünde jemledi. Türkiýe emin Jüneýt Çakyryň eminlik eden duşuşygyň 5-nji minutynda Angliýanyň ýygyndysy öňe saýlandy. Oýnuň birinji ýarymy şu hasap bilen tamamlandy.
Duşuşygyň ikinji ýarymynda erjel oýun görkezen horwatlar 68-nji minutda Perişiç bilen hasaby deňledi. Duşuşykda 30 minut goşmaça wagt berildi. Goşmaça wagtyň ilkinji 15 minudynda toparlara tapawutlanmak başartmady. Ikinji 15 minutda has gowy oýnan Horwatiýanyň ýygyndysy 109-njy minutda Manjukiç bilen hasaby 2:1-e getirdi we ýeňiş gazandy.
15-NJI IÝUL FINAL
20:00 Fransiýa – Horwatiýa
14-NJI IÝUL 3-NJI ÝER ÜÇIN DUŞUŞYK
19:00 BELGIÝA – ANGLIÝA