Angliýanyň «Tottenhem» klubynyň ýarym goragçysy Kristian Eriksen Italiýanyň «Inter» toparynyň düzümine goşuldy. Bu barada «Interiň» «Twitterdäki» resmi hasabynda habar berildi.
Klub 27 ýaşly daniýaly futbolçy bilen 2024-nji ýylyň 30-njy iýunyna çenli şertnama baglaşdy. Tejribeli oýunçy üçin «Interiň» «Tottenheme» näçe töländigi heniz aýan edilenok.
Öňräk klublaryň bu transfer üçin 20 million ýewro möçberinde ylalaşyga gelendigi, bu puldan 2 million ýewronyň «Aýaksyň» hasabyna geçiriljekdigi ýazylypdy. Mälim bolşy ýaly, Kristian Eriksen 2013-nji ýylda «Aýaksdan» London şäheriniň klubyna geçipdi.
Käbir çeşmelerde futbolçynyň «Interde» her ýyl 10 million ýewro gazanjakdygy aýdylýar. Şeýlelikde, ol Kriştianu Ronaldudan soňra Italiýanyň «Seriýa A» çempionatynda iň köp hak tölenýän futbolçy bolar.
Kritian Eriksen şu möwsümde «Tottenhemiň» düzüminde 28 duşuşyga gatnaşdy. Şolarda 3 gezek tapawutlanan futbolçy, 3 goluň asistini amala aşyrdy.