Türkmenistanda elektroenergetika pudagynda iri taslama durmuşa geçiriler. Ol hem halkalaýyn energoulgamdyr. Bu ýerde gürrüň Ahal — Balkan we Balkan — Daşoguz elektrik geçiriji ulgamyny çekmek barada gidýär.
Bu taslamanyň işjeň durmuşa ornaşdyrylmagy üçin degişli kararlar kabul edildi. Türkmenistanyň Prezidenti Ministrler Kabinetiniň mejlisinde şu taslama degişli Karara gol çekdi. Şol resminama laýyklykda, Türkiýe Respublikasynyň «Çalik Enerji Sanayi ve Tijaret A.Ş.» kompaniýasy Ahal-Balkan we Balkan-Daşoguz ýokary woltly asma elektrik geçirijisiniň ulgamy üçin telemehanika, kommunikasiýa we «SCADA» ulgamynyň taslamasyny düzmek, getirmek, gurnamak hem-de ulanyşa girizmek işlerini alyp barar.
Bu taslamanyň çäklerinde Ahal welaýatynyň çäginden Balkanabat şäherine çenli uzynlygy 450 kilometr, güýjenmesi 220 kW bolan iki zynjyrly howa elektrik geçiriji ulgam, şeýle hem Daşoguz welaýatynyň çäginden Balkan welaýatyna çenli uzynlygy 560 kilometr, güýjenmesi 500 kW bolan howa elektrik geçiriji ulgamy çekiler. Taslama laýyklykda, bu howa elektrik geçirijiniň ugrunda güýjenmesi 500 kW barabar bolan iki sany we güýjenmesi 220 kW barabar bolan iki sany, jemi 4 sany elektrik bekedini gurmak göz öňünde tutulýar.
Bu taslama Türkmenistanyň elektrik energiýasynyň daşary ýurt bazaryna iberilýän möçberini ep-esli artdyrmaga mümkinçilik berer.