«Safdie Architects» binagärlik kompaniýasy Singapuryň Çangi halkara howa menzilinde ýapyk binadaky dünýäde iň uly şaglawugy gurdy. Äpet gümmeziň astynda ýaýbaňlandyrylan çemenzarlygyň arasynda ýerleşdirilen şaglawugyň beýikligi 40 metre ýetýär. Aýdylyşyna görä, ol minutda 37 müň litr suwy sarp edýär.
Gümmez ýokary hilli, çydamly aýnadan ýasalypdyr. Gün yşygy gowy düşüp duran gümmeziň astynda tebigatyň ajaýyp görnüşi emele getiripdir. Bu ýerde özüňi howa menzilinde däl-de, tebigatyň goýnunda ýaly duýmaga ähli mümkinçilikler bar. Täze şaglawuk bu ýerdäki gözelligi has-da artdyrdy diýip dünýä metbugaty ýazýar.
Gurluşygy dört ýyl dowam eden bu toplumyň gymmaty Singapuryň hökümetine 1,25 milliard dollara düşdi. 17-nji aprelde howa menzili dabaraly ýagdaýda açyldy.