Hormatly okyjylar – biz sizi kino dünýäsiniň meşhur aktýorlary hem-de aktrisalary bilen yzygiderli tanyşdyrmagymyzy dowam etdirýäris. Ozal, Silwester Stallone, Morgan Friman, Jonni Depp, Çeki Çan ýaly dünýä belli aktýorlar barada maglumatlar beren bolsak bu gezek zenan aktrisalar barada gyzykly maglumatlary dykgatyňyza ýetirmegi makul bildik. Ony hem Golliwudda yz galdyran hem-de owadanlygy bilen kino muşdaklaryň söýgüsini gazanan Anželina Joliden başladyk.
Aktrisanyň ýaşlygy
Kino aktrisa, kinorežissýor, prodýuser, fotomodel bolan dünýä belli Anželina Joli 1975-nji ýylyň 4-nji iýunynda ABŞ-nyň Los-Anjeles şäherinde dünýä inýär. Kakasy Jon Waýt Golliwudyň ýyldyzy we Amerikanyň jemgyýetçiliginde uly abraýdan peýdalanýar. Jon Waýt 1971-nji ýylda aktrisa Marşelin Bertrand bilen durmuş gurdy. Iki ýyldan soň, olaryň Jeýms Hawen atly ogly bolýar we 1975-nji ýylda Anželina Joli Waýt dünýä inýär. Çagalaryň atlary iňlis dilinde “Haven-Jennet”, fransuz dilinde “Joli-owadan” diýmekdir. 1978-nji ýylda maşgala ýagdaýy sebäpli çagalar ejeleri bilen Nýu-Ýork şäherine göçüp gelýärler. Aktrisa meşhur “Li Strasberg” aktýor mekdebine girýär. Şol bir wagtda Bewerli Hillsdäki abraýly umumy bilim berýän mekdebe gatnaýar eken. Mekdebi bir ýarym ýyl öň tamamlamagy başarýar.
Karýerasy barada
Joli 14 ýaşynda moda sergilerinde esasan Nýu-Ýorkda, Los-Anjelesde we Londonda model bolup işläp başlapdyr. Şondan soň 16 ýaşynda teatra gaýdyp geldi. Şol bir wagtyň özünde dogany Jeýms Hawen, kino sungaty mekdebine gatnap başlaýar we aktrisa doganynyň synag kinosynyň bäşisinde baş keşbi janlandyrdy. Resmi taýdan Anjelina Joliniň 1993-nji ýylda ýerine ýetiren “Cyborg 2: Glass Shadow” filminde adama meňzeş robotyň keşbi, ilkinji keşbi diýlip hasaplanylýar. Joliniň kino durmuşynda uly üstünligi 70-nji ýyllarda “Jia” atly terjimehal dramasynda esasyndaky ýerine ýetiren keşbi boldy. Şol dramanyň esasynda 1998-nji ýylda Anželina ilkinji “Altyn globus” baýragyny gazandy.
Režissýorlyk işleri hakda
2007-nji ýylda aktrisa özüni ilkinji gezek režissýor hökmünde synap görmek kararyna geldi we tomaşaçylara “Wagtyň bir ýeri” atly dokumental filmi hödürledi. Ondan soň Joli öz taýýarlan ssenariýasy esasynda “Gan we bal topragynda” atly dramasy boldy. 2014-nji ýylda Joliniň üç ugur boýunça Oskar baýragyny eýe bolan “Döwülmedik” atly başga bir söweş dramasy çykdy. Indiki işi Anželina Joli we Bred Pitt bilen baş keşbi janlandyran “Göm-gök” filmi bolýar. 2017-nji ýylda aktrisa üçin gaty möhüm bolan “Ilki kakamy öldürdiler” atly film tomaşaçylara hödürlendi. Ol Joli üçin ýakyn adam bolan kambojaly ýazyjy Long Unyň hakyky hekaýasyna esaslanýar. Film “Altyn globus” baýragyna dalaşgär görkezildi we aktrisanyň iň gowy režissýorlyk eseri boldy.
Haýyr-sahawat işleri hakda
Anjelina Lara Kroftyň surata düşüriş işlerine gatnaşmak üçin ilkinji gezek Kamboja geldi we ýerli ilatyň ýaşaýan şertlerine haýran galdy. Şol pursatdan başlap, ynsanperwer meseleleri aktrisanyň durmuşynda esasy orun eýeläp başlady. Aktrisa diňe bir haýyr-sahawat işine ummasyz pul bermek bilen çäklenmän, bosgunlaryň çagalary üçin mekdepleriň gurulmagyna hem gatnaşdy. 2001-nji ýylyň awgust aýynda aktrisa BMG-nyň hoşniýetli ilçisi diýlip yglan edildi we 2005-nji ýylda Dawosda geçirilen Bütindünýä ykdysady forumynda bu ugurda çykyş etmäge çagyryldy. Anželina ägirt uly maliýe goşantlaryny yzygiderli geçirýän birnäçe haýyr-sahawat gaznasyny hem döretdi. Mundan daşary aktrisa täsirli syýasatçylar, telekeçiler we ykdysatçylar bilen ýygy-ýygydan yzygiderli duşuşýar, adam hukuklary boýunça sapaklar berýär we London Ykdysadyýet mekdebiniň myhman professory bolup durýar.
Şahsy durmuşy
Meşhur aktrisanyň alty çagasy bar. Onuň 3 ogly we 3 gyzy bar. Ogullarynyň atlary: Meddoks Şiwan, Paks Týen, Noks Leon. Gyzlarynyň ady: Zahara Marli, Şaýlo Nuwel, Wiwýen Marşelin.
Anželinanyň baýraklary
Joli üç dürli kategoriýada yzly-yzyna üç gezek “Altyn globus” baýragyny gazanan ilkinji aktrisalaryň biri boldy. Telewizor filminde ýa-da kiçi serialda we çeper filmde iň oňat aktrisa diýen derejä eýe boldy. 2019-njy ýylda “Guerlain” atly parfýumeriýasyny mahabatlandyrýar we iň owadanlaryň sanawynda birinji orunda durýar.
“Forbes” žurnalynyň habaryna görä, 2009, 2011 we 2013-nji ýyllarda Joli Golliwudda iň köp girdeji gazanan aktrisa diýlip yglan edildi.
Siz şeýle hem şu sungat sungat ussatlary baradaky makalalary okap bilersiňiz
Silwester Stallone: Rembo we Rokki Size seslenýär
Morgan Frimen – Golliwudyň iň hormatlanýan aktýory
Jeki Çan – aktýor we aýdymçy
