Yslam dünýäsinde mukaddes Oraza aýy dowam edýär. Bu aýyň hormatyna köpçülikleýin agyz beklenilýär. Käbir döwletlerde agyz açar sadakalaryny köpçülikleýin guramaklyk däbe öwrülip gidipdir. Dünýä metbugaty Orazanyň ilkinji günlerinde Ýer ýüzi boýunça iň uly agyz açar sadakalarynyň sanawyny düzdi. Ilkinji bäşligi Aziýa döwletlerindäki sadakalar emele getirýär.
1. Saud Arabystany – Medine Münewwara. Bu ýerdäki Nabawiý metjidinde geçirilýän agyz açar sadakasyna 25 müňden gowrak adam gatnaşdy. Ozal hem iri sadakalary, dini çäreleri bilen meşhurlyk gazanan metjitde ilkinji agyz açar günlerinde tebigy suw, hurma we dürli miweler paýlanyldy.
2. Eýran – Maşad, Ymam Ryza meýdany. Eýranyň iň uly metjitleriniň birindäki agyz açara 12 müňden gowrak adam gatnaşdy.
3. BAE – Abu-Dabi şäheri, Şeýh Zaýed metjidi. Orazanyň ilkinji günlerinde bu metjitdäki agyz açar sadakalaryna 25 müňden gowrak adam gatnaşdy. Sadakanyň dowamynda howpsuzlyk, lukmançylyk hyzmatlary hem berk tertipde ýola goýuldy diýlip, metbugat neşirlerinde ýazylýar.
4. Saud Arabystany – Mekke mükerrama. Dünýädäki iň uly agyz açar sadakasy. Bu ýerdäki desterhanyň umumy uzynlygy 12 müň metre ýetýär. Her metr ýerde azyndan 3 adamyň oturyp bilýändigini nazarda tutsak…
5. Hindistan – Delidäki Juma metjidi. 140 milliondan agdyk musulmanyň ýaşaýan döwletinde agyz açar sadakasynyň kiçi-girim bolmajakdygy öz-özünden düşnükli.
Goşmaça: Sanawyň 6-njy ornunda Tatarystanyň paýtagtyndaky “Kazan arena” sport toplumynda berlen agyz açar sadakasy bar. Oňa agyz bekleýänleriň 10 müňüsi gatnaşdy.