Tatarystanyň bilim we ylym ministriniň birinji orunbasary Andreý Pominow Kazan şäherinde geçirilen söwda-ykdysady, ylmy-tehniki we medeni hyzmatdaşlyk boýunça bilelikdäki türkmen-tatar iş toparynyň 9-njy mejlisinde eden çykyşynda Tatarystanyň ýokary okuw mekdeplerinde bilim alýan daşary ýurtly talyplaryň 30 göteriminiň Türkmenistanyň talyplarydygyny belledi.
– 1-nji iýuldaky maglumata görä, Türkmenistandan 7753 talyp bilim alýar. Bu örän gowy görkeziji. Täze okuw ýyly üçin kabul edişlik bilen bu görkeziji has-da artar – diýip, Andreý Pominow belledi.
Onuň bellemegine görä, Türkmenistandan gelen talyplaryň agramly bölegi Kazan federal uniwersitetinde bilim alýar. Tatarystanyň 43 sany ýokayr okuw mekdebinde 150 müň talyp bilim alýar, olaryň 22 müňe golaýy daşary ýurtly talyplardyr.
Şeýle hem Tatarystanyň käbir uniwersitetleri Türkmenistanyň ýokary okuw mekdepleri bilen hyzmatdaşlyk edýär.
Türkmenistan hem öz gezeginde “Innopolis” uniwersitetine 60 sany maglumat tehnologiýasy ugry boýunça hünärmeni hünärini ýokarlandyryş okuwyna iberer. Bu barada “Türkmenaargatnaşyk” agentliginiň başlygynyň orunbasary Nurmyrat Rejepow belledi.
Türkmen hünärmenleri kiberhowpsuzlyk, elektron hökümet ýaly ugurlarda öz hünärlerini kämilleşdirerler. Türkmenistan Tatarystan bilen kiberhowpsuzlygy babatda hyzmatdaşlygyny ösdürmäge gyzyklanma bildirýär. Şeýle hem maglumat tehnologiýalary parklary boýunça hyzmatdaşlyk etmek meýilleşdirilýär.